Ana kidung rumekso ing wengi
Teguh hayu luputa ing lara
luputa bilahi kabeh
jim setan datan purun
paneluhan tan ana wani
niwah panggawe ala
gunaning wong luput
geni atemahan tirta
maling adoh tan ana ngarah ing mami
guna duduk pan sirno

Sakehing lara pan samya bali
Sakeh ngama pan sami mirunda
Welas asih pandulune
Sakehing braja luput
Kadi kapuk tibaning wesi
Sakehing wisa tawa
Sato galak tutut
Kayu aeng lemah sangar
Songing landhak guwaning
Wong lemah miring
Myang pakiponing merak

Pagupakaning warak sakalir
Nadyan arca myang segara asat
Temahan rahayu kabeh
Apan sarira ayu
Ingideran kang widadari
Rineksa Malaikat
Lan sagung pra rasul
Pinayungan ing Hyang Suksma
Ati Adam utekku Baginda Esis
Pangucapku ya Musa

Napasku Nabi ‘Isa linuwih
Nabi Yakub pamiryarsaningwang
Dawud suwaraku mangke
Nabi Ibrahim nyawaku
Nabi Sulaiman kasekten mami
Nabi Yusuf rupeng wang
Idris ing rambutku
Baginda “Ali kuliting wang
Abubakar getih daging Umar singgih
Balung Baginda Usman

Sumsumingsun Fatimah linuwih
Siti Aminah bayuning angga
Ayub ing ususku mangke
Nabi Nuh ing jejantung
Nabi Yunus ing otot mami
Netraku ya Muhammad
Pamuluku Rasul
Pinayungan Adam Hawa
Sampun pepak sakathahe para nabi
Dadya sarira tunggal